02 Resemi 2012 13:14
Biryara doza Roj TV ya Eutalsatê di 10’ê sibatê de ye

Li hemberî zextên navneteweyî televîzyona Kurdî, Roj Tv bi rêbazên hiqûqî li ber xwe dide. Hate diyarkirin dê doza îtîrazê ya Roj TV ya li hemberî biryara rawestandina weşana Roj TV ya ji aliyê Eutelsatê ve, îro li Dadgeha Îdarî ya Parîsê pêk hat û bi encam bû. Biryara dawî ya dozê di 10’ê sibatê de dê bê dayîn.

Şîrketa Eutelsatê ya Fransî, biryara Dadgeha Kopenhatê ya der barê Roj TV de kir hincet û di 24’ê çile weşana Roj TV ya li ser peykên girêdayî xwe rawestand. Roj TV jî li Dadgeha Îdarî ya Franseyê îtîraza vê biryarê kiribû. Piştî wê jî, Roj Tv bi peyka Itelsatê ya li ser Yewnanîstanê re weşanê dike li hev kir, lê ji ber zextên DYA’yê weşana Roj Tv li vir jî hate rawestandin.

Di 10’ê çile de, Dadgeha Denmarkê bi hinceta şîrketên Roj TV A/S û Mezopotamya Broadcasting A/S zagona Denmarkê ya li dijî terorê bin pê kiriye, 65 hezar kron (11 hezar dolar, 8700 euro) ceza li wan birî. Her wiha ji bo 40 rojan jî cezayê pere birî û ev yek bi giştî dike 5 milyon û 200 kronê Denmarkî, ango 699 hezar û 339 euro. Şîrketa Eutelsatê vê biryara Dadgeha Bajêr a Kopenhagê kir hincet û di 24’ê çile de weşana Roj TV ya li ser peykên girêdayî xwe rawestand.

DYA: ME ROJ TV BÊ DENG KIR

Balyozê Amerîkayê yê Enqereyê Francis Ricciardone di hefteya borî de li Enqereyê di daxuyaniyekê de got; “Roj TV bê deng bû. Em ji Tirkiyeyê hemû tiştên ku em bikaribin dikin” û bi vî awayî li xwe mikûr hat ku weşana Roj Tv bi hevkariya DYA’yê hatiye rawestandin.

Hûn dikarin bikevin malpera (www.roj.tv) û di beşa ‘Zindî’ ya malperê de li ser navnîşana (http://video.roj.tv/channel/view/roj-75) temaşeyê Roj TV bikin.

<<Önceki Haber || Sonraki Haber>>