12 Gulan 2011 13:32
DOKH'ê banga 'Qirkirina civakê rawestînin' kir

Hevparên DOKH'ê, bi boneya balê bikşînin ser kuştinên jinan û li dijî kuştin û qirkirina jinan dengê xwe bilind bikin li ber Edliyeya Amedê civiyan û diyar kir ku "Qirkirina jinan qirkirina civakê ye, qirkirina civakê rawestînin" û xwestin dawî li qirkirina civakê bê.

Endam û nunerên hevparên DOKH'ê, bi boneya balê bikşînin ser êrîş, kuştin û zextên li dijî jinan, li ber avahiya Edliyeya Amedê civiyan û daxuyanî dan çapemeniyê. Jinan di daxuyaniyê de dowîzên "Ji kuştina jinan re bes e", "Hêj duh li Mêrdînê Pelda Ekenek ji aliyê hevserê xwe ve hate kuştin", "Kuştinên jinan ji sedî 1400 zêde bû", "Jin jiyan azadî" û "Qirkirina jinan, qirkirina civakê ye" rakirin. Her wiha wêneyên jinên ku hatin kuştin hatin vekirin. Li ser navê endam û rêveberên DOKH'ê Sevda Erdem Ateş, anî ziman ku di her qadê jiyanê de ji ber feraseta serdestiya zilam jin rastî êrîşa zilam tên û wiha got: "Jin li aliyekî rastî lêdan, îşkence û tecawiza zilam tên, li aliyê din tên kuştin. Li gel vê yekê berpirsiyar û sûcdar nayê parastin."

'Kuştina jinan polîtîk e'

Ateş, anî ziman ku li gorî daneyên fermî di 7 salên dawî de kuştina jinan ji sedî hezar û 400 zêde bûye. Ateş, da zanîn ku herî dawî li navçeya Dêrika Mêrdînê Pelda Ekenek ji aliye hevserê xwe ve hate kuştin û wiha got: "Ev kuştin tev polîtîkin. Li gel vê yekê dîsa tetbîrên li dijî kuştina jinan nayê stendin û kujer tên parastin."

Ateş, daxuyand ku dê danişîna biryarê ya Ayşe Paşali ku ji aliyê hevserê xwe ve hate kuştin di rojên pêş de bê dîtin û wiha got: "Mixabin hêj kujer di nava civakê de digerin. Li gel kujer tên zanîn jî nayên darizandin." Em bang li her kesî dikin û dibêjin qirkirina jinê qirkirina civakê ye. Qirkirina civakê rawestînin. Piştî daxnuyaniyê, jinan, bi boneya kuştina jinan şermezar bikin li ber avahiya dadê nîv saetê çalakiya rûniştinê pêk anî.

<<Önceki Haber || Sonraki Haber>>

Diger Jîn