03 Resemi 2012 11:06
Daxwaza hevbeş: Kongreya Netewa Kurd

Hevdîtinên heyeta Kongreya Civaka Demokratîk (KCD) û BDP'ê yên li Herêma Federal a Kurdistanê bi partiyên siyasî û rêxistinên saziyên sivîl re dewam dikin. Parlamanterên BDP'ê Mûlkiye Bîrtanê, Murat Bozlak û Ozdal Uçer jî di nav de heyeta ku ji Tirkiyê hat herêmê doh êvarê bi Cîgirê Serokê Partiya Demokratên Kurdistan (PDK) Fazil Mîranî, nûnerê Partiya Yekîtiyên Demokratîk (PYD) a Herêma Federal a Kurdistan Dr. Hûseyîn Koçer, nûnerên partiya Şûiyên Kurdistan, nûnerên Partiya Zahmetkêşên Kurdistan û nûnerên Partiya Neteweyên Demokratik a Kurdistan re li Otêla Şerotonê hatin ba hev. Di hevdîtinan de rewşa Rojhilata Navîn şert û mercên Kurdistanê û çareseriya pirsgirêka kurd hatin nirxandin.

'Divê kongre di demeke nêz de pêk bê'

Parlementerê BDP'ê yê Edenê Murat Bozlak bal kişand li ser kongreya netewî û got; "Kongre ji bo Kurdistanê gelekî girîng e. Pêdiviya gelê kurd ji her demê zêdedir vê demê bi yekîtiyeke xurt heye. Kongre di nava destkeftiyên gelekî mezin de dê pêk bê. Lewma divê demildest ev kongre pêk bê."

PYD: Em ji bo kongrê amade ne

Nûnerê PYD'ê Dr. Hûseyîn Koçer jî diyar kir ku di demeke wiha hessas de Kongrêya Netewî ya Kurdistanê peywireke girîng e û ew jî wekî gelê kurd ê Sûriyê ji bo Kongrê ya Netewî ya Kurdistan amade ne. Hûseyîn banga hemû rêxistin û partiyên siyasî kir ku di pêkanîna kongreya neteweyî rol û rista xwe bilîzin.

'Erka partiyan girîng e'

Piştî PYD'ê heyet bi nûnerên Partiya Şûiyên Kurdistanê re hevdîtin pêk anîn. BDP Parlamentera Qarsê Mûlkiye Bîrtanê li ser navê heyetê axivî û got; "Em hêvî dikin ku ev hevdîtina me ji bo lidarxistina kongrê bibe pêngaveke erênî. Em dixwazin bêy ku dem derbas bikin kongreya neteweyî pêk bînin. Lewma berpirsyariyeke mezin dikeve ser milê me hemûyan. Erka partiyan girîng e. Divê her rêxistin û partiyeke siyasî yekîtiya navxweyî esas bigire."

'Divê peyameke xurt ji vê kongreyê derkeve'

Endamê Navenda Partiya Şûiyên Kurdistanê Mihammed Şêxanî jî wiha axivî: "Daxwazên me hevbeş in. Pêwîst e di vê kongreyê de ji bo dewletên desthilatdar peyameke xurt derkeve holê. Di vê demê de pêdiviya gelê kurd a vê peyamê heye."

Amadekariyên kongreyê

Parlementerê Wanê Ozdal Uçer jî di hevdîtina bi Partiya Yekitiya Netewî ya Demokratên Kurdistan (YNDK) de anî ziman ku ji bo lidarxistina kongreyê divê hemû partî û rêxistinên kurd bikevin nava liv û tevgerê û wiha axivî: "Em jî wekî Kongrêya Civaka Demokratîk ji bo kongreyê di nav liv û tevgerê de ne. Em dixwazin kongre di vê buharê de pêk bê. Desthilatdarên ku ji yekîtiya gelê kurd ditirsin zext û zordestiya xwe zêde dikin. Lewma divê ji niha de amadekariyên kongreyê destpê bikin û helwesteke xurt derxînin holê."

'PKK tevlî nebe kongre nabe'

Sekreterê YNDK Gaffûr Maxmûrî jî anî ziman ku hewceye ku gelê kurd di vê dema hessas de xwedî yek helwestî bin û wiha axivî: "Divê hemû rêxistinên kurd tevlî vê kongreyê bibin. Heke PKK tevlî vê kongreyê nebe ev kongre nabe Kongreya Netewî ya Kurdistanê. Yan jî partiyên me yên parçeyên Kurdistanê tevlî nebin nabe. Divê em hemû dorhêlên siyasî û civakî tevlî kongreyê bikin. Divê yekîtiya navxweyî xurt bibe û hemû dorhêlên li Kurdistanê di nava vê avasaziyê de cih bigirin."

DÎHA

<<Önceki Haber

Diger Kurdistan