29 Rebéndan 2012 13:16
ÎHD ji bo 'gorên komî yên AKP'ê' wê gilî bike

Sekretere Şaxa ÎHD'ê ya Amedê Racî Bîlîcî, diyar kir ku ew di serdema hikûmeta AKP'ê de bi gorên komî yên nû re rû bi rû ne. Bîlîcî, da zanîn ku dema leşkeran endamên HPG'ê yên li navçeya Çelê di operasyonê de jiyana xwe ji dest dan dît ji mirovahiya xwe fedî kir. Bilici, anî ziman ku piştî ew belgeyan kom bikin dê der barê berpirsiyarên wê demê de serlêdana sûc bikin.

Ajansa me DÎHA'yê duh der barê wêne û dîmenên ku leşkeran li navçeya Çelê ya Colemêrgê cenazeyên endamên HGP'ê bi komî defin dikin nuçeya "Ev jî gora komî ya serdema AKP'ê ye?" weşand. Pişt re wêne û dîmenên vê gora komî li ser malperên facebookê hatin belavkirin. Li ser vê rewşê Sekreterê Şaxa ÎHD'ê ya Amedê Racî Bîlîcî, bertekên xwe anîn ziman û wiha got: "Min ev dîmen dît muyê canê min bûşûjin. Min ji mirovahiya xwe şerm kir. Di dîmenan de xuya dibe ku endamên HPG'ê bi komî tên qetilkirin û pişt re li ber çavên fermandaran bi komî tên definkirin. Li dijî hiqûq û mafên mirovan tev digerin û mirovan li dijî sincê mirovahiyê defin dikin. Ev xuya dike ku hişmendiya berê didome. Em serdema berê rexne dikin. Lê em dibînin ku di vê serdema AKP'ê de jî dîsa gorên komî dubare dibin.

'ÎHD dê serlêdana sûc bike'

Bîlîcî, destnîşan kir ku piştî ew der barê vê bûyerê de lekolîn bikin û belge û daneyan bi dest bixin dê bi lezgîn serlêdana sûc bikin û wiha got: "Ji bo gora komî bê vekirin û nasnameya wan kesan bê diyarkirin em dê serî li qereqola leşkeran bidin û bixwazin ku malbat pişt re biçin cenazeyên xwe wergirin."

'Biryara veşariyê ya JÎTEM'ê li ku ma?'

Bîlîcî bal kişand ser kolandina gora komî ya JÎTEM'ê û wiha berdewam kir: "Ji bo kolandina gora kamî ya navenda JÎTEM'ê biryara veşartina dosyayê anîne. Parazvanên mafên mirovan, malbatan û parêzeran nêzî cihê kolandinê nakin. Der barê kolandinê de agahiyan nadin. Dedîl çawa tên komkirin? Kolandin li gorî çi tê kirin? Parlementerên AKP'ê serbest diçin li wir daxuyaniyê didin. Dikevin wê qadê. Lê ji bo me qedexe ye. Ger ku biryara veşarî hebe çima ew dikarin biçin cihê bûyerê û çima en nikarin biçin? "

'Ensarîoglu û Eronat ezbere diaxivin û ser bûyerê vedişêrin'

Bîlîcî, daxuyaniya Parlementera AKP'ê ya Amedê Oya Eronat ku ji aliyê YSK'ê ve li şûna Hatîp Dîcle hate bicihkirin û Galip Ensarîoglu jî rexne kir û wiha got: "Oya Eronat û Galip Ensarîoglu, ne antropolog in. Daxuyaniya wan a 'Hestî ne aydî salên 90'î ne, daxwaza veşartina rastiyê ye. Dixwazin bûyerê veşêrin.

Bîlîcî, da zanîn ku hin hestiyên hatin dîtin şandin Satiya Tipa Edlî û wiha lê zêde kir: "Lê dibêjin hestiyên mirovan in. Dixwazin ser van rastiyan bigirin û aloz bikin. Ev yek samîmiyeta wan nîşan dide. Rastiyê berovajî dikin. Bûyerên salên 90'î wekî bûyerên beriya zayinê nîşan didin. 155 hefteye ji bo winda bên dîtin û kujer bên darizandin em çalakiyan pêk tînin. Lê heta niha hikûmetê tu gav neavêtiye.

'Dewlet li gorî usûlê lêkolînê nake'

Bîlîcî, destnîşan kir ku lêkolîn û kolandin li gorî rêbazên zanistî û usûlê nayê kirin û wiha dawî li axaftina xwe anî: "Dewlet li gorî qural û usûlê lêkolîne nake. Dibêje ger ku ez gorê vekim ez dê bi kepçeyan vekim. Ji bo Navenda JÎTEM'ê jî xwest bi kepçeyan bikole. Lê Midûrê Çand û Turîzmê ji ber ku ev der cihekî dîrokî ye destûr neda. Divê rastî li gorî rêbazên zanistî bê lêkolînkirin û ronîkirin."

Sertaç Kayar/DÎHA

<<Önceki Haber || Sonraki Haber>>