01 Berfanbar 2011 18:45
Li 11 navendan çalakiyên 'Pêncşema Reş'

Li Amed, Êlih, Riha, Mêrdîn û Şirnexê çalakiyên Pêncşema Reş hatin lidarxistin û li dijî operasyonên KCK'ê nerazîbûn hate nîşandan û hişyariya "rewş ber bi faşîzmê ve diçe" hate kirin. Di daxuyaniyan hate gotin ku girtîgeh êdî bûne wekî kampên naziyan.

ŞIRNEX

Li Şirnexê di çalakiya Pencşema Reş de vê hefteyê jî xebatkarên şaredariyê û nûnerên rêxistinên sivîl ên civakî li ber avahiya xizmetê ya şaredariyê hatin ba hev. Endamê Tum Bel-Sen'ê Sebahattîn Denîz li vir axivî û wiha got: "Em wekî xebatkarên Şaredariya Şirnexê dixwazin hevalên me yên ku armanca wan tenê xizmet dayîna gel bû bên berdan û vegerin li ser karên xwe. Heta hevalên me vegerin li ser karên xwe em ê çalakiya xwe bidomînin." Denîz anî ziman ku hemû hevalên wan ji ber ku siyaseta demokratîk meşandine hatine girtin. Denîz got ku heke bêdengkirina gel tê xwestin ev operasyon dê tu caran encamê negirin.

HEZEX

Li navçeya Hezexê ya Şirnexê bi çalakiya Pêncşema Reş li dijî girtin û binçavkirinan nerazîbûn hate nîşandan. Gelek kesên ku li ber avahiya şaredariyê kom bûn pankarta ku li ser wêneyên şaredarên Hezex, Şirnex û Silopiyê hene rakirin. Li ser navê komê Wekîlê Şaredarê Hezexê Selahattîn Acar axivî û li dijî operasyonên girtinê û yên leşkerî ku di demên dawî de zêde bûne nerazîbûn nîşan da. Avci got ku ew her roj bi nûçeyên girtinên nû hişyar dibin û AKP dixwaze gelê kurd bêhêz bike, lê li şûna kesên ku tên girtin hevalên me yyên din bigirin û karên wan bidomînin. Avci anî ziman ku AKP a ku destên aştiyê nabîne dê bibe berpirsyarê hemû êşan. Daxuyanî bi çepikan bi dawî bû.

SILOPÎ

Xebatkarên Şaredariya Silopiyê vê hefteyê jî çalakî li dar xistin. Çalakî li ber avahiya Şaredariyê hate lidarxistin. Di çalakiyê de wêneyên şaredarên Hezex, Silopî û Şirnexê û pankarta "hûn nikarin îradeya gel kelepçe bikin" li avahiya şaredariyê hate daliqandin. Xebatkarê şaredariyê Adurrahman Demîrhan ve hefteyê axivî û bal kişan li ser operasyonên di bin navê KCK'ê de tên kirin. Piştî çalakiyê 5 deqîqe çalakiya rûniştinê hate lidarxistin.

CIZÎR

Çalakî li ber avahiya xizmetê ya şaredariyê vê hefteyê pêk hat û gelek kes beşdar bûn. Berdevkê Demî yê KESK'ê yê Cizîrê Mahmut Duru diyar kir ku hikûmeta AKP'ê êrîşên xwe yên li dijî saziyên demokratîk ên kurdan didomînin. Duru girtin şermezar kir. Duru bal kişand li ser nîqaşên li ser Dêrsimê yên di demên dawî de tên kirin û xwest Serokwezîr Tayyîp Erdogan li Meclîsê di rûniştineke de lêborînê bixwaze. Duru anî ziman ku divê netenê Dêrsim ji Mereş, Çorum, Gazî, Zîlan û Şirnexê jî lêborîn bê xwestin.

Çalakî bi 5 deqîqe rûniştinê bi dawî bû.

WÊRANŞAR

Li navçeya Wêranşarê ya Rihayê li ber avahiya xizmetê ya şaredariyê çalakî hate lidarxistin. Cîgira Serokê BDP'ê Wêranşarê Suna Ulugturken daxuyanî da û got ku AKP'ê ola îslamê bi kar aniye û bi vî rengî bûye îktidar lê piştre tu pirsgirêk çareser nekiriye. Ulugturken anî ziman ku di nava 2 salên dawî de di bin navê KCK'ê de 4 hezar kes hatine girtin, êdî hesabên kesên ku tên binçavkirin ne diyar e. Ulugturken got ku armanca girtinan bêdengkirina gel e. Çalakî bi 5 deqîqe rûniştinê bi dawî bû.

PIRSÛS

Li navçeya Pirsûsê ya Rihayê jî çalakî hate lidarxistin. Wekîla Şaredarê Pirsûsê Hulya Demîr jî di nav de gelek kes beşdarî çalakiyê bûn. Serokê BDP'a Pirsûsê Mehmet Kayhan daxuyanî da û got ku qirkirina siyasî didome û bi van tecrîd jî her diçe giran dibe.

AMED

Xebatkarên Şaredariya Peyasê jî ji bo Şaredar Zulkuf Karatekîn û siyasetmedarên kurd cara 95'emîn çalakî li dar xistin. Di çalakiyê de banga tevlibûna danişîna doza KCK'ê ya di 6'ê kanûnê de hate kirin. Di çalakiyê de nûnerê Sendîka Genel Îş'ê Mehmet Şah Sarikaya axivî û got ku dema girtîbûna siyasetmedaran veguheriyaye cezakirinê.

QOSER

Li navçeya Qoserê wekî her hefteyê vê hefteyê jî çalakiya Pencşema Reş li ber avahiya Şaredariyê pêk hat. Gelek kes beşdarî çalakiyê bûn. Nûnerê Egîtîm Sen'ê Salîh Kuday, anî ziman ku kesên wekî AKP'ê nefikirin tên binçavkirin û girtin û rastî cezayan tên. Kuday, anî ziman ku mala wan, telefona wan, sazî û dezgehê wan û hemû tiştê wan ên taybet di bin wenêrtin û kontrola polîsan de ye.

NISÊBÎN

Li navçeya Nisêbînê ya Mêrdînê jî di hefteya 5'emîn de çalakiya xwe berdewan kir. Koma li ber avahiya Şaredariyê kom bû jî pankarta "Dest nede vîna min" vekir. Nûnerê Genel Îş'ê Sadik Fîdanê bertek nîşan da û anî ziman ku ew li hemberî neheqê bêdeng nemînin.

DÊRIK

Li Navçeya Dêrikê ya Mêrdînê jî bi heman rengî çalakî hate lidaxstin. Koma li ber avahiya şadedariyê kom bû, girtin û binçavkirin şermezar kir. Rêveberê BDP'ê yê Adîl Aktaş daxuyanî da.

ÊLIH

Li Êlihê jî girseya ku li ber avahiya Şaredariye kom bû di hefteya 95'an de çalakiya xwe berdewam kirin. Endam û rêveberên BDP'ê, endamên meclîsa şaredariyê û wekîlên şaredar amade bûn. Li ser navê komê Serokê Şaxa Egîtîm Sendê Bulent Hatun, daxuyanî da û operasyon şermezar kir.

(mae/sa)

<<Önceki Haber || Sonraki Haber>>

Diger Rojane