28 Rebéndan 2012 12:17
Îro jî terora girtin û binçavkirinê ya AKP'ê dewam kir

Li navçeya Mêrdînê Qoserê di saetên serê sibê de polêsên AKP'ê avêtin ser avahiya şaredariyê, rêxistina BDP'ê, akademiya siyasetê û gelek malan.

Di serdagirtinan de dest danîn ser gelek belge û amûran.

Tevî serokê rêxistina BDP'a navçeyê Kenan Akdogan, alîkara şaredar Leyla Salman û nûnerê Azadiya Welat ê Mêrdînê Azîz Tekîn 11 kes jî hatin binçavkriin.

11 kesên binçavkirî di saetên nîvroyê de sewqî edliyê kirin.

Rêxistina BDP'a Mêrdînê jî bi daxûyaniyek diyar kir ku ewê sibê saet 12'an li ber avahiya BDP'a Qoserê bi çalakiyek vê terorê protesto bikin û banga tevlîbûn li xelkê Mêrdînê û Qoserê kir.

Li Sêrtê jî hêzên dewleta Tirk 17'ê Çile şaredarê Dihê Melîh Oktay û alîkarê Şaredarê Misircê Çaçan Yorulmaz kiribû binçavan lê piştre serbest berdabû.

Li ser îtiraza dozgeriyê Oktay û Yorulmaz îro tevî 3 kesên din hatin binçavkirin.

Tevî şaredarê Dihê Melîh Oktay û alîkarê şaredarê Misircê Çaçan Yorulmaz piştî îfadedayînê hatin girtin.

Bi vî awayî hejmara kesên ji 17'ê Çile û vir ve hatin girtin li Sêrtê gihişt 11 kesan.

Li Erziromê jî serokê rêxistina BDP'a Giyadînê Seyît Kaya hat binçavkirin û bi îdîaya endamê rêxistinê ye hate girtin.

Li navçeya Colemêrgê Geverê jî 2 birayên bi navê Ilyas û Umît Yorgun ên rojên derbasbûyî hatibûn binçavkirin, bi îdîaya propagandaya rêxistinê kirine hatin girtin.

Li Stenbolê jî di operasyonên li Maltepe û Kuçukarmutluyê de 19 kes hatin binçavkirin.

Ji wan 7 kes, bi îdîaya endamên DHKP-C'ê ne hatin girtin.

<<Önceki Haber || Sonraki Haber>>

Diger Kurdistan