29 Rebéndan 2012 11:48
Li Wanê dîsa şewata kon: Zarokekî 3 salî jiyana xwe ji dest da

Li Wanê li aliyek perîşaniya gel a ji ber 2 erdhejên mezin dewam dike, li aliyê din jî dawî li erdhejokan nayê. Vê serê sibê dîsa bi dijwariya 4.4 erdhejek rû da. Di çadirên ku gel têde bi zehmetî jiyana xwe dewam dikin de jî, ji bilî sermayê şewat dibe sedema mirinan.

Li Wanê vê serê sibê saet li derdora 6'an dîsa erdhej çêbû.

Hat ragihandin erdhej bi dijwariya 4.4 pêk hatiye û navenda wê jî gundê Akçîft e.

Li gorî agahiyên despêkê di vê erdhejê de tişt bi kesî nebûye.

Li aliyê din perişaniya gel a di konan de û mirinan ji ber şewatan jî dewam dike.

Li Gundê Çermîka ê bajaroka Erçeka doh êvarê dîsa agir bi çadirek ket.

Di şewatê de zarokê 3 salî Mustafa Alti jiyana xwe ji dest da. Dayik Saliha Atli jî dema xwest kurê xwe yê birîndar ji agir xelas bike, di nava şewatê de ma û birînda bû.

Heta niha li Wanê 127 kon şewitîn û di şewata konan de 11 kesan jiyana xwe ji dest dane.

Li aliyê din şert û mercên zehmet ên zivistanê û xemsariya dewletê jî jiyana xelkê Wanê zehmettir dike.

Çadirên havînê yên dewletê bi navê 'Konbajarê Mehmetçîk' ava kirine û gelek çadirên gel bi derfetên xwe vegirtine, ji ber berfa zêde hilweşiyan.

Bi taybetî çadirên ku şirketa alikariyê ya Îngiliz Shelter Box şandibû û dewleta Tirk bi navê 'Konbajarê Mehmetçîk' ava kiribû di bin berfê de man û xelk perîşan in.

Kurdistaniyên di nava şert û mercên zehmet de hewl didin jiyana xwe berdewam bikin nerazîbûn nîşanî xemsariya dewletê didin û dibêjin Tevî ku Tayyip Erdogan gotiye di serê meha Çile de emê li herkesî konteyniran belav bike, heta niha ti konteynir nehatî taxê.

Ji welatiyan Zeynel Enicür, destnîşan kir ku konên ew têde dimînin tev yên havînê û dibêje; soza konteynira dan me, lê dema konteynir zivistanê neyê emê havînê çi ji wan bikin.

Kader Özgökçe jî dibêje ji ber sar û seqemê bi taybetî kal û pîr û zarok tev nexweş in, li ber mirinê ne û xema ti kesî jî nîne.

Kurdistaniyê bi navê Alî Tunç jî dide znaîn ku dema li Stenbolê berf dibare hemû dewlet seferber dibe lê ev 4 meh in em li derve di bin baran û berfê de ne dewlet halê me napirse.

Fadil Can jî bibîr dixe ku Tayyip Erdogan gotiye ji serê meha Çile û pê ve wê li Wanê konbajar nemîne, li şûna wan konteynir bên belavkirin û dibêjê: 'Li ser sozên xwe nasekinin. Serokwezîr bi xwe wusa got, lê zivistan xilas bû em hê di çadirên havînê de ne. Ji ber sar û seqemê heta berbanga sibê em nikarin rakevin.

<<Önceki Haber || Sonraki Haber>>