05 Berfanbar 2011 10:34
Prz. Gumuş: Siyasî ketiye xwîna hiqûqê

Parêzer Mesut Beştaş, têkildarî operasyonên KCK'ê û binçavkirina rêveberên BDP'ê yên ji aliyê Dadgeha bi Rayeya Taybet ve tê meşandin, diyar kir ku tê xwestin BDP'ê îlegal bidin nîşandan û wiha got: "Divê ne dadgehên herêmî, Dadgeha Makeqanûnê der barê partiyek siyasî de biryar bide. Prz. Fethî Gumuş jî anî ziman ku siyaseta AKP'ê ketiye nava hiqûqê û ketiye nava Dadgehên Bi Rayeyên Taybet.

Li Tirkiyeyê di 1963'an de Dadgeha Makeqanûnê hate avakirin. Ji dema Dadgeha Makeqanûnê hate avakirin heta niha, der barê 26 partiyên siyasî de biryara girtinê hate dayîn. Ji salên 1990'an heta niha partiyên HEP, OZDEP, DEP, DDP, DKP, HADEP, HAK-PAR, DEHAP û DTP ku ji bo çareseriya pirsgirêka kurd hatin ketin nava hewldanan hatin girtin. Her çend piştî referamdûma 12'ê îlonê ya makeqanûnê girtina partiyên siyasî zahmet bûn jî dîsa BDP di bin şopandina daraz û darizandinê deye. Di salên dawî de hemû xebat û çalakiyên BDP'ê ji ailyê dozger û dadgeran ve wekî "banga rêxistinê" û "propaganda rêxistinê" tê dîtin û tê xwestin îlegal bê nîşandan. Pergala darazê dîsa vediguhere Dadgehên Ewlehiyê yên Dewletê (DGM). Dadgehên Bi Rayeya Taybet wekî DGM'ê tev digerin û hemû hewldanên siyasî dixin bin lêpirsînê. Di demên dawî de hemû xebamtên BDP'ê ji aliyê Dadgehên Bi Rayeya Taybet ve ji nêz ve tên şopandin û girtin û binçavkirinên li ser endamên BDP'ê zêde bûn. Di 3 salên dawî de operasyonên wekî "Qirkirina siyasî" tê bi navkirin û bi navê "KCK" tên meşandin bi hezaran endam û rêveberên BDP'ê hatin girtin. Parêzeran têkildarî helwesta darazê ya li ser BDP'ê nirxandin.

Prz. Beştaş: Tu biryara derd barê BDP'ê de tune

Ji 14'ê nîsana 2009'an heta niha li ser navê "KCK" bi hezaran siyasetmedarên kurd hatin binçavkirin û girtin. Prz. Mesut Beştaş, der barê girtin û binçavkirinên liser endamên BDP'ê de diyar kir ku darazê li ser navê operasyonên KCK'ê BDP xistiye bin şopa darazê. Beştaş, anî ziman ku her diçe pêlên operasyona li ser navê KCK'ê pêk tê fireh dibe û herî dawî heta parêzerê Rêberê PKK'ê Abdullah Ocalan jî belav bûye. Beştaş, anî ziman ku di çarçoveya operasyonên KCK'ê de endam û rêveberên baskê ciwanan û baskê jinan ên di bin BDP'ê de xebatên zagoni dimeşînin û rêveberên BDP'ê yên navendî û bajaran jî tên girtin û binçavkirin. Prz. Beştaş, destîşan kir ku kar û xebatên ciwan û jinan ên di bin baneyên BDP'ê de dimeşînin jî wekî karên îlegal nîşan didin û dixazin BDP'ê îlegal bidnin nîşan. Beştaş, bal kişand ser akademiyên siyasê yên BDP'ê jî û bilêv kir ku li ser navê operasyonên "KCK'ê" dixwazin xebatên BDP'ê yên li gorî rêziknameye dimeşînin jî wekî îlegal nîşan bidin. Beştaş, bilêv kir ku dadgehên herêmî nikarin der barê partiyên siyasî de biryarê bidin û tenê Dadgeha Makeqanûnê divê der barê partiyen siyasî de biryarê bidin.

Prz. Gumuş: Li Kurdistanê hiqûq xelas bûye

Prz. Fethî Gumuş jî anî ziman ku ji sala 1973'an heta niha parêzeriyê dike û wiha got: "Di sala 1980'an de Dadgeha Rêveberiyên Awarte (SYM) hatin avakirin. Di sala 1990'an de Dadgehên Ewlehiyê yên Dewletê (DGM) hatin avakirin. Niha jî Dadgehên Bi Rayeya Taybet ku li şûna DGM'ê cih digirin hatine avakirin. Piştî Dadgehên Bi Rayeya Taybet hatin avakirin êdi em li SYM û DGM'ê digerin. Di serdema hikûmeta AKP'ê de piştî Dadgeha Bi Rayeya Taybet hate avakirin siyaset ket nava xwîna hiqûqê. Îro parêzer û dadger bi fermana AKP'ê tev digerin. Pêkanîn bi vî renegî nameşe."

Gumuş, anî ziman ku bi taybetî li herêmê bêhiqûqî zêdetir e û wiha berdewam kir: "Bi taybetî li Kurdistanê bêhiqûqî zêdetir e. Li vir dadgehên siyasî hiqûq xelas kiriye. Li dadgehan dadger bêalîtiya xwe winda kirine. Dadger û dozger ne serbixwe ne. Dadger û dozger li gorî ferman û daxuyaniyên Wezîr û Serokwezîran tev digerin. Rejîma dîktatoriyê tê meşandin. Pêşeroja Tirkiyeyê bi dîktatoriya AKP'ê re rû bi rû ye.

<<Önceki Haber || Sonraki Haber>>