'Xweza ber bi tunebûnê ve diçe'

Parlamenterê BDP'ê yê Şirnexê Hasip Kaplan di 3'yemîn Komcivîna EGEÇEP'ê de axivî û got ku ew kesên hawirdorê, xwezayê û çandê tune dikin, cudatiha tu nijad, ziman, ol, netewe û civakê nakin û ew çerxa xwe ya hovane dizivirînin. Şaredarê Bergamayê Mehmet Gonenç jî got ku xweza bi ber bi tunebûnê ve diçe.

3'yemîn Komcivîna EGEÇEP'ê li Navenda Pêşangehan a Tepekuleya Îzmirê pêk hat. Parlamenterê BDP'ê Hasip Kaplan, Parlamenterê AKP'ê Mehmet Emin Hidir, Parlamenterê CHP'ê Mustafa Kemal Cengiz û gelek hawirdorparêz tevlî komcivînê bûn. Gundiyên Bergamayê jî kefenê li serê 'Mirî xwe bi zêran naxemilînin' li xwe kirin û bal kişandin ser tunebûna xwezayê. Parlamenterê BDP'ê û Endamê Komîsyona Lêkolînkirina Pirsgirêkên Berbesvaniyê Hasip Kaplan di beşa bi navê 'Bandora madenvaniyê ya li ser qadên jiyanê' de axivî û got ew kesên hawirdorê, xwezayê û çandê tune dikin, cudatiha tu nijad, ziman, ol, netewe û civakê nakin û ew çerxa xwe ya hovane dizivirînin. Kaplan wiha axivî: "Divê ku di hemû civakê de, li dijî wan kesên ji bo pere xwezayê tune dikin hişmendiyeke bê afirandin. Ne tenê 72 milyon, dewlemendiya xwezaya me dikare 720 milyon mirovan xwedî bike. Divê li çar aliyê Tirkiyeyê li dijî vê mêtîngeriyê nerazîbûn bên nîşandan."

'Divê em xwe ji koletiya DYA'yê rizgar bikin'

Endamê Komîsyona Lêkolînkirina Pirsgirêkên Berbesvaniyê (Manencilik) û Parlamenterê AKP'ê Mehmet Emin Hidir jî da zanîn ku mirovên sosyalîst pir îdealîst in û got: "Heke dirust bin, bila canê min bigirin. Canê min feda ye. Lê bila ji bo hin tiştan bigirin. Divê ew kesên ku ji bo parastina hawirdorê têdikoşin, objetifiya xwe winda nekin. Ez hin caran hawirdorparêzan nemafdar dibînim. Gelo li dijî berbesa Marmarayê ne? Em li dijî berbesa zêr in? Di binê me de 5 hezar û 500 ton zêr heye. Divê em xwe êdî ji koletiya DYA'yê rizgar bikin. Divê dema em li zêran bigerin ne nerihetiyê bidin gundiyan û ne jî nebin sedema seqetbûna sewalan." Endameke din ê komîsyonê Parlamenterê MHP'ê Mustafa Kemal Cengiz jî daxuyand ku tiştê kefir qul dike, ne leza avê ye, berdewamkirina avê ye û wiha pê de çû: "Heke hawirdorparêz dixwazin bi ser bikevin, divê çalakiyên xwe her bidomînin."

'Li Tirkiyeyê pirsgirêka demokrasiyê û dîktatoriyê heye'

Serokê Lijneya Rêveber a Odeya Endezyarên Metalorjiyê Cemalettin Kuçuk jî ev 20 sal in ew li dijî vê yekê têdikoşin û wiha dirêjî da axaftina xwe: "Ev bi deh salan e em li ber xwe didin. Li gelek cihan heman tişt bû. Li wê jî digotin ku dê xweza tu zirarê nebîne. AKP, beriya ku bê desthilatdariyê li dijî vê yekê bû. Lê em niha dinêrin ku bi dilekî mezin vê yekê dixwaze. Dibêjin em dê serê dolimê 5 hezar TL bidin. Dixwazin mirovan bi pereyan bixapînin. Divê her kes biçe û xebatên berbesan ên li Mûnzûrê bibîne. Dîsa li Balya'yê jî ev berbes 70 sal berê hatin girtin lê hê jî ji ber wî sewal seqet dimînin. Hê jî masî dimirin. Dîsa li Eşmeyê jî di sala 2006'an de rewşeke wiha qewimî. Me dît ku mirov ji ber hîdrojena siyanûran jehrî bûne. Niha dixwazin heman tiştî li Bergamayê bikin. Ev şîrketa dixwaze vê berbasê vekole, bi televîzyon û rojaneyên xwe propagandaya vê yekê dike. Divê ku em destûrê nedin vê yekê."

'Dê çamên fistiqan jî bê tunekirin'

Şaredarê Bergamayê Mehmet Gonenç jî derbirî ku li wan doza li dijî berbasê qezenc kiriye lê dîsa jî xebatên lêgerîna zêran bi lezgînî didomin. Xweza bi gefên mezin re rû bi rû ye. Cewhera Bergamayê qedandin. Niha jî çav berdan Kozakê. Li Kozakê dê tenê xwezayê tune nekin. Dê çamên fistiqê yên ku gundî debara xwe pê dikin jî dê bê tunekirin. Divê ku hemû gergamayî û kozakî bi hev re têbikoşin." Berdevkê Demê yê Platforma Hawirdora Bergamayê Erol Engel jî da xuyakirin ku cara yekem gudniyên Bergamayê biryareke dadgehê ya bi vî rengî girtine û êdî Bergama ji bo hemû kesên ku ji bo hawirdorê têdikoşin re bûye çavkaniya hêzê.

'Midûrê Giştî yê Şîrketa li Berbasê zavayê Serokwezîr e'

Aktîvîstê hawirdorê Prof. Dr. Tahir Ongur jî ji hemû endamên Komîsyona Lêkolînkirina Pirsgirêkên Berbesvaniyê xwest ku ev axaftinên xwe wekî pirsiyarnameyeke bixin rojeve parlamentoyê jî. Ongur wiha dirêjî da axaftina xwe: "Şîrketa Rio Tintoyê ya ku oli Erzinganê xebatê dikir, ji sedî 20'ê xebatan dewrî şîrketeke tirk kir. Ev şîrket jî şîrketa bi navê Çalik Madencilik e û Midûrê Giştî yê vê Şîrketê jî zavayê Serokwezîr e. Mixabin li Tirkiyeyê hevpariyên mezin ên stratejîk hene. Ev hepvarî jî dê di pêşerojê de bibin sedema hin pirsgirêkên mezintir."

E-MAIL THIS

PRINT THIS